Greinar frá mánuðinum March, 2008
Hvað er að gerast? Um nám í hnattvæðingu og aðlögun innflytjenda
Eftir nokkurra ára námshlé var mig farið að þyrsta í að bæta við mig ofan á BA-prófið mitt og fannst líka að það gæti verið góð hugmynd að prófa að búa annarsstaðar en á Íslandi. Okkur heimilisfólkinu kom saman um að það væri fínt að taka hænuskref og stefna að því að finna nám á einhverju Norðurlandanna. Fyrir valinu varð mastersnám í hnattvæðingu og aðlögun innflytjenda (Master i globalisering og integration) sem kennt er við Háskóla Suður-Danmerkur (Syddansk Universitet) í Odense. Námið er eitt ársverk kennt á tveimur árum (fjórum önnum) þar sem nemendur og kennarar hittast eina stífa fyrirlestrahelgi í mánuði, s.s. svipað og fjarkennsla á Íslandi.
Lesa áfram »Um hvernig heimurinn öðlast tilgang
Í greininni hér á undan var greint frá hugmyndum William James um hvernig menn þurfi að kasta frá sér hinni gömlu trú ef þeir eigi að geta sæst við nýja og breytta heimsmynd. Menn eiga ekki að þurfa að hafna trúarbrögðum alfarið heldur þurfi þeir að laga guðshugmyndina að nýrri heimsýn vísindanna. En hann vill einnig meina að lífið geti haft tilgang og að það sé í okkar valdi að skapa þann tilgang. Og hann lætur ekki þar við sitja, hér verður fjallað um hvernig James færir rök fyrir því að frumhlutverk manna sé að uppfylla þann tilgang sem heimurinn geti haft og þar með veita lífum okkar tilgang og hvernig það hlutverk hefur siðferðilegt vægi.
Lesa áfram »Hin nýja heimsmynd kallar á nýjan Guð
William James (1842-1910) var bandarískur heimspekingur og sálfræðingur, frumkvöðull innan sálfræðinnar og einn af höfundum gagnsemishyggjunnar (pragmatism) innan heimspeki. Í greinum sínum Is Life Worth Living? og The Sentiment of Rationality lýsir James hugmyndum sínum um Guð og útskýrir hvaða hlutverki hann telji menn gegna í tilgangi lífsins. Hér er fjallað um hvernig James vill meina að hægt sé að laga trúarbrögðin að nýrri heimsmynd vísindanna, hvernig menn geta haft áhrif á örlög heimsins og það hvernig heimurinn getur öðlast tilgang.
Lesa áfram »Spice World - Gleðibyltingin
Flestir muna eftir Spice Girls æðinu sem tryllti heimsbyggðina undir lok síðustu aldar. Hljómsveitin var starfrækt á árunum 1994 — 2001 en kom aftur saman á stuttu tónleikaleikaferðalagi nú fyrir skömmu. Á hátindi ferilsins, árið 1997, kom út kvikmynd þeirra Spice World. Þrátt fyrir misjafna dóma gagnrýnenda varð myndin gríðarlega vinsæl og setti af stað hið svokallaða Spice Girls æði um heim allan og halaði inn um 75 milljónum dollara.1 Þrátt fyrir að söguþráður myndarinnar og leikur stúlknanna gæti seint talist verðlaunaverður hafði myndin þó nokkur samfélagsleg áhrif og hér á eftir mun ég leitast við að rifja upp sögu hljómsveitarinnar og útskýra áhrif myndarinnar á samfélagið.
Lesa áfram »Saturday Night Fever - Kynhlutverk diskódraumsins
Myndin Saturday Night Fever kom út í desember árið 1977 og var John Travolta þar í aðalhlutverki sem ungi maðurinn Tony Manero. John Travolta var ein skærasta stjarna Hollywood á þessum árum. Naut hann sérlega mikillar hylli hjá unglingum og var hann eitt helsta átrúnaðargoð þeirra. Handrit myndarinnar var unnið út frá blaðagrein er birtist í New Yorker Magazine í júlí árið 1976, en greinin fjallar um lífstíl æsku þess tíma. Samkvæmt greininni strituðu flest ungmenni alla virka daga en slepptu sér lausum á laugardagskvöldum og dönsuðu á diskótekum.1 Myndin sló í gegn þegar hún kom út.2 Mánuði áður en Saturday Night Fever var frumsýnd kom tónlistin úr myndinni út á breiðskífu, en um tónlistina sáu m.a. hljómsveitin Bee Gees, sem var gífurlega vinsæl diskóhljómsveit. Saturday Night Fever The Original Soundtrack hljómplatan er mest selda kvikmyndatónlistarplata í heimi og inniheldur m.a. lög sem flestir kannast við í dag, eins og „Stayin' Alive“, „Night Fever“, „How Deep Is Your Love“ og „You Should Be Dancing“ en öll þessi lög eru með Bee Gees. Með útkomu myndarinnar og plötunnar varð gífurleg aukning á vinsældum diskó tónlistar, en fyrir útkomu Saturday Night Fever naut diskóið aðeins vinsælda hjá þröngum hópi ungs fólks.3
Lesa áfram »Deilan um Bittorrent. Ævintýrið að líða undir lok?
Á síðustu misserum hafa miklar umræður skapast um lögmæti svokallaðra jafningjaneta (e. Peer to peer). Komst sú umræða í hámæli er sýslumaðurinn í Hafnarfirði féllst á kröfu nokkurra rétthafasamtaka um lögbann á heimasíðuna torrent.is þann 19. nóvember síðastliðin. Var því haldið fram að þar færi fram ólögmæt dreifing á höfundaréttarrvörðu efni. Samhliða lögbanninu var höfðað staðfestingarmál á hendur Istorrent ehf. og Svavari Lútherssyni, sem var einn helsti stjórnandi síðunnar frá upphafi. Þeir aðilar sem að lögbanninu standa krefjast ekki einungis staðfestingar á lögbanninu, heldur gera þeir einnig kröfu um skaðabætur og að Svavari verði ekki heimilt að reka sambærilegar vefsíður og torrent.is. Er þessi pistill er skrifaður stendur aðalmeðferð málsins ennþá yfir, en einungis hefur verið rætt um formhlið málsins, þar sem Istorrent ehf. og Svavar hafa krafist frávísunar málsins. Fróðlegt verður að sjá hvernig þessu máli mun ljúka og hvort horft verði til sambærilegra dómsmála sem fallið hafa í nágrannalöndum okkar. Undirritaður ætlar hér að varpa ljósi á þau álitaefni sem við koma höfundarétti og BitTorrent tækninni.
Lesa áfram »Sirkus Geira Smart
Í hvaða föt fórstu í morgun og hvað réði því að þú fórst í þau frekar en einhver önnur? Sastu hugsandi á rúmstokknum og valdir klæðnað í samræmi við veðurspána, verkefni dagsins, eða líklegan smekk þeirra sem þú kæmir til með að hitta? Valdirðu snjáða flíspeysu eða draugfína dragt? Hnépokandi gallabuxur eða stífpressuð jakkaföt?
Lesa áfram »„Þegar á unga aldri lifi ég enn og leik mér aldrei”
Titill þessarar greinar eru tvær línur varðveittar úr íslenskri lausavísu1 en þær gefa ef til vill ákveðna innsýn á líf barna. Hver sú sýn er fer eflaust eftir lesendanum hverju sinni en ætla má að börn hafi verið hluti af íslenskum veruleika í gegnum tíðina og að þau hafi með tilvist sinni sett mark sitt á fortíðina. Ef athuganir fornleifafræðinga á börnum eru skoðaðar er hins vegar ekki um auðugan garð að gresja, því fáar rannsóknir hafa verið gerðar á lífi þeirra eða tilvist hérlendis. Hugmyndir um börn nútímans virðast oft vera yfirfærðar á hugmyndir um börn í fortíðinni, án þess að rannsóknir liggi þar að baki. Innan fornleifafræðinnar hefur þó á síðustu árum komið fram undirgrein, barnafornleifafræði, sem líkt og nafnið gefur til kynna fjallar um börn, bernsku og málefni tengd þeim.
Lesa áfram »