Lögfræðiþjónusta Lögréttu

Um leið og ég hafði aðstoðað fyrsta skjólstæðinginn minn fylltist ég sterkum tilfinningum. Gífurlegu stolti yfir að sjá nám mitt nýtast í verki og finna að afrakstur síðustu fjögurra ára hefur fyllilega borgað sig. Um leið fylltist ég gleði yfir því að geta hjálpað fólki sem átti ekki í önnur hús að venda. Þessar tilfinningar voru þó ekkert í samanburði við þá ólýsanlegu tilfinningu sem reið yfir mig augnabliki síðar, þegar bylgja þakklætis streymdi yfir mig frá viðkomandi skjólstæðing.

Þátttakan í því mikilvæga verkefni sem Lögfræðiþjónusta Lögréttu er, er ómetanleg reynsla. Um leið og maður lætur gott af sér leiða, öðlast maður dýrmæta reynslu og um leið eykur maður við þekkingu sína. Lögfræðiþjónustan er því öllum til góðs, bæði þeim sem hennar njóta og þeim sem að henni standa.

Lögfræðiþjónusta Lögréttu var sett á stofn, þann 21. mars síðastliðinn, í samstarfi við Lagadeild Háskólans í Reykjavík. Lögfræðiþjónustan hefur aðsetur í Alþjóðahúsinu og þar er tekið á móti skjólstæðingum á hverju miðvikudagskvöldi frá kl. 17-21. Einnig er hægt að hafa samband við okkur í síma 551-5800 á miðvikudagskvöldum eða senda okkur tölvupóst á netfangið lth@logretta.is. Þótt stutt sé liðið frá því að þjónustan var sett á stofn, hefur hún farið hratt og vel af stað og mikið vatn runnið til sjávar á þessum skamma tíma.

Það eru sjálfboðaliðar af 3., 4. og 5. ári úr lagadeild Háskólans í Reykjavík sem settu á stofn og sjá um að reka Lögfræðiþjónustu Lögréttu, en Lögrétta er félag laganema við Háskólann í Reykjavík. Við vonumst til að þetta sé einungis byrjunin á löngu og farsælu starfi og að laganemar framtíðarinnar haldi áfram því ötula starfi sem þegar hefur verið unnið.

Meginmarkmið Lögfræðiþjónustunnar er að veita innflytjendum og fólki af erlendum uppruna ókeypis lögfræðiaðstoð. Um er að ræða stóran þjóðfélagshóp sem auðgar mannlífið og er jafnframt nauðsynlegur vinnumarkaði. Það er mikilvægt að slíkir hópar aðlagist sem best íslensku þjóðfélagi. Að mörgu er að hyggja þegar flutt er í nýtt land og mörg álitaefni geta komið upp. Íslenskt lagaumhverfi getur jafnframt verið afar frábrugðið því sem gerist annars staðar í heiminum og því sem fólk á að venjast.

Skjólstæðingarnir sem leitað hafa til okkar koma hvaðanæva að úr heiminum. Tungumálakunnátta fólks er afar misjöfn, sumir hafa lært einhverja íslensku en aðrir styðjast við önnur tungumál. Margir taka með sér vin sem getur hjálpað við að túlka, á meðan í öðrum tilfellum hefur reynst nauðsynlegt að panta túlk. Algengast er þó að fólk geti gert sig skiljanlegt.

Fjölmargir hafa leitað til Lögfræðiþjónustu Lögréttu og verkefnin sem laganemarnir mæta eru afar fjölbreytt. Meginverkefni Lögfræðiþjónustunnar er að ráðleggja innflytjendum og fólki af erlendum uppruna um réttarstöðu sína hérlendis. Fólk vill ýmist fá upplýsingar um réttarstöðu sína á ákveðnum sviðum eða telur jafnvel að á sér hafi verið brotið. Málin geta varðað allt frá smávægilegum ágreiningi og álitaefnum til alvarlegri mála, en til okkar leitar jafnvel fólk sem orðið hefur fyrir ofbeldi, til dæmis líkamsárásir en jafnframt konur af erlendum uppruna sem orðið hafa fyrir heimilisofbeldi og vita ekki hvert þær geta snúið sér. Margir hafa jafnframt leitað til okkar eftir upplýsingum um málefni á borð við atvinnuleyfi, dvalarleyfi og ríkisborgararétt, en það svið virðist vefjast fyrir mörgum. Einnig hafa fjölmörg annars konar verkefni borið á góma Lögfræðiþjónustunnar. Sum mál eru einföld í sniðum, t.d. ef einstaklingum vantar einfaldlega upplýsingar eða leiðbeiningar til að mynda við hvern á að hafa samband við gerð skattaskýrslu, á meðan önnur mál eru talsvert umfangsmeiri, deilur vegna leigusamninga, umsókn um hæli, svo eitthvað sé nefnt. Eitt er þó víst, að maður lærir eitthvað nýtt í hverri viku.

Við reynum eftir fremsta megni að aðstoða fólk við þau vandamál sem upp koma, en vísum fólki á viðeigandi aðila ef þörf er á, til að mynda til lögreglu ef leggja þarf fram kæru, eða til viðkomandi stéttafélags ef svo stendur á. Í einstaka tilfellum er lítið annað hægt að gera en að vísa fólki til lögmanns. Það er þó gleðiefni að flestir þeir sem til okkar hafa leitað hafa fengið lausn á málum sínum í kjölfarið. Flestir, ef ekki allir skjólstæðingarnir okkar ganga út með bros á vör og eru þakklátir fyrir hjálpina. Lögfræðiþjónusta Lögréttu hefur fengið góðan meðbyr.

Samstarfsaðilar okkar, lagadeild Háskólans í Reykjavík og Alþjóðahús hafa veitt okkur ómetanlegan stuðning og hefur verkefnið jafnframt hlotið styrki frá öðrum aðilum. Alþjóðahús leggur til húsnæði og hefur aðstoðað okkur við að útvega túlka, þegar þörf hefur verið á slíku. Einnig höfum við starfað í samstarfi við lögfræðing Alþjóðahúss, Margréti Steinarsdóttur. Lagadeild Háskólans í Reykjavík hefur stutt rækilega við bakið á Lögfræðiþjónustunni, meðal annars látið okkur í té tölvubúnað og veitt okkur fjárhagslegan stuðning.

Lögfræðiþjónusta Lögréttu hefur vakið mikla athygli á skömmum tíma. Það sést hvað best á því hversu vel þjónustan hefur tekið við sér og aðsóknin verið góð. Þjónustan hefur ekki verið auglýst, en þó var birt tilkynning á vefsíðu Alþjóðahússins og í dagblaði þess, auk þess sem Lögfræðiþjónustan hefur fengið umtalsverða umfjöllun í flestum fjölmiðlum. Það má einnig geta þess að Lögfræðiþjónusta Lögréttu var á dögunum tilnefnd til Íslensku forvarnarverðlaunanna 2007.

Við teljum framlag okkar vera þarft og við gerum allt sem í okkar valdi stendur til að aðstoða fólk og sjá til þess að fólk fái þá aðstoð sem það þarfnast. Við viljum láta gott af okkur leiða um leið og við öðlumst dýrmæta reynslu.

Við bjóðum fólk velkomið í Alþjóðahúsið, Hverfisgötu 18, öll miðvikudagskvöld frá klukkan 17 til 21.