Ásgrímur Jónsson var afkastamikill myndlistarmaður og málaði ótal margar altaristöflur fyrir íslenskar kirkjur. Hann var fæddur árið 1876 og lést 82 ára gamall árið 1958. Ekki er til heildarskrá yfir öll hans verk.
Hann nam myndlist í Kaupmannahöfn rétt upp úr aldamótum síðustu aldar og var fyrsti íslenski listamaðurinn sem gat lifað á list sinni. Altaristöflur eftir hann má finna í kirkjum víða um land. Hér verður þó einkum rætt stuttlega um fjórar þeirra.
Fyrst má nefna altaristöfluna í Grindavíkurkirkju. Þar má sjá myndlýsingu Ásgríms af frásögninni um það þegar Jesús stillti storminn. Slík tafla á einkar vel við í sjávarplássi enda var það kaldur raunveruleiki þorpa á borð við Grindavík að sjórinn bæði gaf og tók. Athygli vekur að bakgrunnur þessarar myndar sýnir íslenska kletta og brim sem er Íslendingum afar kunnuglegt. Hér stendur Jesús í bátnum ásamt hræddum lærisveinum sínum, án geislabaugs, þrekinn og kraftmikill eins og íslenskur sjómaður, ljós yfirlitum. Þessi altaristafla var sett upp í kirkjunni árið 1916.
Því næst má nefna altaristöfluna í Keflavíkurkirkju sem sett var upp í kirkjunni þetta sama ár. Myndin sýnir frásögnina um fjallræðuna. Enn má sjá íslenskt landslag í bakgrunni. Trúlega hefur það vakið fyrir listmálaranum að færa efni og boðskap safnaðarins nær þeirra veruleika. „Í henni kennir endurreisnaráhrifa og rómantíkur.“ (kirkjublaðið.is).
Þetta sama ár er falleg altaristafla sett upp í Víðidalstungukirkju. Enn sýnir bakgrunnurinn íslenskt landslag. Í Kirkjublaðinu segir: „Í baksýn eru íslensk fjöll og vatn sem vísar óbeint til Galíleuvatnsins. Fagur himinn í baksýn. Myndin er í raunsæisstíl með rómantísku yfirbragði – minnir á margar endurreisnarmyndir.“
Að lokum verður hér minnst á altaristöflu í Hrepphólakirkju. Hún virðist vera máluð síðar en hún var sett upp í kirkjunni árið 1924. Sú altaristafla sker sig frá ofangreindum myndum hvað stíl varðar en ekki síður sker staðsetning myndarinna sig úr. Hér vísar Ásgrímur ekki til íslensks landslags heldur nýtir staðsetningu frásagnarinnar sem gerist í Emmaus. Þar má sjá framandi húsbyggingar Emmausborgar út um glugga herbergis sem Jesús situr í ásamt tveimur lærisveinum sínum.
Í kirkjublaðinu segir: „Í myndinni má kenna expressjónískra áhrifa eða síð-impressjónískra og pensilstrokur eru vel sjáanlegar.“
Þótt stíll Ásgríms hafi verið breytilegur eiga allar þessar myndir ættir að rekja til hinnar sígildu evprópsku Jesúmyndahefðar.